महाराष्ट्र विधानपरिषदेच्या १० जागांसाठी येत्या २० जून रोजी निवडणूक होत आहे. विधानससभेतील संख्याबळानुसार भाजपचे ४, राष्ट्रवादी आणि शिवसेनेचे प्रत्येकी २, काँग्रेसचा एक आणि १० व्या जागेसाठी पुन्हा भाजप आणि मविआमध्ये चुरस होऊ शकते. तत्पूर्वी रिक्त होणाऱ्या १० जागांवर कुणाला संधी मिळू शकते तर विद्यमान आमदारांपैकी कुणाला डच्चू मिळू शकतो, याची चर्चा सुरु झाली आहे. अशातच पक्षाने आपल्याला विधान परिषदेवर पाठवावं ही कार्यकर्त्यांची इच्छा असल्याचं पंकजा मुंडे म्हणाल्या आहेत.
बीड : राज्यसभेची रणधुमाळी सुरु असताना राज्यातही विधान परिषद निवडणूक पार पडत आहे. इच्छुक नेत्यांची आपापल्या पक्षाकडे, नेत्यांकडे लॉबिंग लावायला सुरुवात केली आहे. अशातच मी विधान परिषदेवर जावं ही कार्यकर्त्यांची मनापासून इच्छा आहे, असं वक्तव्य BJP भाजप नेत्या पंकजा मुंडे Pankaja Munde यांनी केलंय. याचवेळी पक्ष जो निर्णय घेईल तो मला मान्य असेल, असं सांगायला देखील त्या विसरल्या नाहीत.
महाराष्ट्र विधानपरिषदेच्या १० जागांसाठी येत्या २० जून रोजी निवडणूक होत आहे. विधानससभेतील संख्याबळानुसार भाजपचे ४, राष्ट्रवादी आणि शिवसेनेचे प्रत्येकी २, काँग्रेसचा एक आणि १० व्या जागेसाठी पुन्हा भाजप आणि मविआमध्ये चुरस होऊ शकते. तत्पूर्वी रिक्त होणाऱ्या १० जागांवर कुणाला संधी मिळू शकते तर विद्यमान आमदारांपैकी कुणाला डच्चू मिळू शकतो, याची चर्चा सुरु झाली आहे. अशातच पक्षाने आपल्याला विधान परिषदेवर पाठवावं ही कार्यकर्त्यांची इच्छा असल्याचं पंकजा मुंडे म्हणाल्या आहेत. त्या टीव्ही ९ मराठीशी बोलत होत्या.
“मी जनतेच्या प्रश्नांवर गेली अनेक वर्ष लढत आहे. आता राज्यात विधान परिषदेच्या १० जागांवर निवडणूक पार पडत आहे. अशावेळी मला विधान परिषदेवर पाठवावं, ही कार्यकर्त्यांची मनापासून इच्छा आहे”, असं पंकजा मुंडे यांनी सांगितलं. “पण शेवटी पक्षाचे वरिष्ठ नेते निर्णय घेत असतात. पक्ष जो निर्णय घेईल, तो मला मान्य असेल”, असंही सांगायला त्या विसरल्या नाहीत.
राज्यसभा निवडणुकीच्या सहा जागांनी गेली दोन आठवडे राज्याचं राजकारण तापलेलं असताना आता विधानपरिषद निवडणुकांची घोषणा झाली आहे. महाराष्ट्राच्या विधानपरिषदेच्या १० जागांसाठी ही निवडणूक होत आहे. २ जूनला अधिसूचना जाहीर होईल. ९ जूनपासून अर्ज दाखल करता येणार आहेत तर २० जूनला मतदान होणार आहे. सत्ताधारी महाविकास आघाडी आणि विरोधात असलेल्या भाजपसाठी देखील ही निवडणूक अत्यंत महत्त्वाची आहे. संख्याबळानुसार भाजपचे सर्वाधिक ४ आमदार पुन्हा विधान परिषदेवर जाऊ शकतात. यामध्ये पंकजा मुंडे आणि चित्रा वाघ यांच्या नावाची चर्चा होते आहे.
पंकजा मुंडे यांना संधी मिळण्याची शक्यता
राष्ट्रवादीचे नेते तत्कालिन विधान परिषदेचे विरोधी पक्षनेते धनंजय मुंडे यांनी परळी विधानसभा निवडणुकीत पंकजा मुंडे यांचा जोरदार पराभव केला. त्या पराभवाला आता तीन वर्ष झाले आहेत. तेव्हापासून पंकजा मुंडे पक्षात एकट्या पडल्याचं चित्र आहे. मागील दसरा मेळाव्यात त्यांनी स्वपक्षीयांवर टीकेचे बाण सोडून मनातला राग व्यक्त केला. आपल्या मनातील खदखद व्यक्त केल्यानंतर काही दिवसांत त्यांची देवेंद्र फडणवीस यांनी भेट घेतली. नंतरच्या काळात त्या पक्षात पुन्हा सक्रिय झाल्या. पाच राज्यांच्या झालेल्या निवडणुकीत देखील पंकजांनी पक्षाने सांगेल तिथे जाऊन प्रचार केला.
दरम्यान, मधल्या काळात पंकजांनी स्वपक्षियांशी जुळवूनही घेतलं. तर ओबीसींचं राजकीय आरक्षण कोर्टाने सध्या संपुष्टात आल्यानंतर सरकारला अडचणीत आणणारा ओबीसी चेहरा म्हणून पंकजांकडे भाजप पाहू लागलं. त्याच उद्देशातून ओबीसी आरक्षणाच्या कुठल्याही घडामोडींवर पंकजा माध्यमांत येऊन सरकारवर टीकेचे बाण सोडू लागल्या. ओबीसींच्या मुद्द्यावर सरकारविरोधात रोष निर्माण करायचा असेल तर पंकजा ती भूमिका चांगल्या प्रकारे पार पाडू शकतात, त्याचमुळे त्यांना उमेदवारी देण्याचा पक्ष विचार करु शकतो, अशी शक्यता राजकीय जाणकारांनी बोलून दाखवली.
गेल्या काही काळात पंकजा यांचा पक्षातला अॅक्टिव्हनेस चांगलाच वाढला आहे. सर्वांत महत्त्वाचं म्हणजे स्वपक्षीयांवर ताशेरे ओढण्याचं प्रमाण देखील त्यांनी कमी केलंय. अशा काळात भाजपने जर सदाभाऊ खोत आणि विनायक मेटे यांना डच्चू दिला तर पंकजा यांच्या नावावर शिक्कामोर्तब केलं जाऊ शकतं, अशी शक्यता आहे.