मागील दोन दिवसांत अदानी समूहाच्या शेअर्समध्ये Adani Group Share Price मोठी घसरण पाहायला मिळाली. अदानी समूहाच्या शेअर्समधील घसरणीने केवळ दोन ट्रेडिंग सत्रांमध्येच गुंतवणूकदारांच्या पोर्टफोलिओमध्ये खूप मोठा परिणाम केला आहे.
देशातील सर्वात मोठी संस्थात्मक गुंतवणूकदार भारतीय आयुर्विमा महामंडळ अर्थात एलआयसी (LIC) देखील अशा परिणाम झालेल्या गुंतवणूकदारांपैकी एक आहे. 24 जानेवारी 2023 रोजी LIC ची अदानी समूहाच्या शेअर्समधील एकत्रित गुंतवणूक 81,268 कोटी रुपये होती ती 27 जानेवारी 2023 रोजी 62,621 कोटी रुपयांवर घसरली. म्हणजेच LIC ला दोन ट्रेडिंग सत्रात 18,647 कोटी रुपयांचा तोटा झाला आहे.
LIC ची अदानी समूहामध्ये किती गुंतवणूक आहे ?
Ace Equity कडे उपलब्ध डेटा दर्शवितो की 31 डिसेंबर 2022 पर्यंत, LIC कडे अदानी एंटरप्रायझेस, अदानी ग्रीन एनर्जी, अदानी पोर्ट्स, अदानी टोटल गॅस, अदानी ट्रान्समिशन आणि अलीकडेच विकत घेतलेल्या सिमेंट कंपनी अंबुजा सिमेंट्स आणि ACC मध्ये प्रत्येकी एक टक्क्यांहून अधिक हिस्सेदारी आहे. गेल्या दोन ट्रेडिंग सत्रांमध्ये या कंपन्यांचे शेअर्स 19 ते 27 टक्क्यांच्या दरम्यान घसरले आहेत.
हिंडनबर्ग रिसर्चच्या अहवालातील ‘त्या’ दाव्यामुळे घसरण
अमेरिकन फर्म हिंडनबर्ग रिसर्चच्या अहवालानंतर अदानी समूहाच्या कंपन्यांच्या शेअर्समध्ये मोठी घसरण झाली आहे. अहवालात दावा करण्यात आला आहे की अदानी समूहाच्या 7 मोठ्या लिस्टेड कंपन्यांचे मूल्य 85 टक्क्यांपेक्षा जास्त आहे. दरम्यान, अदानीचे ग्रुप सीएफओ, जुगशिंदर सिंग यांनी एका निवेदनात म्हटले आहे की हा अहवाल निराधार आहे आणि समूहाची बदनामी करण्याचा हेतू आहे. या अहवालात ज्यांना कोणताही आधार नाही अशा अनेक चुकीच्या गोष्टी सांगण्यात आल्याचे त्यांनी म्हटलं आहे.
कोणत्या गुंतवणुकीत किती घट
24 जानेवारीपासून अदानी टोटल गॅसमधील एलआयसीच्या एकूण गुंतवणुकीत 6237 कोटी रुपयांची घट झाली आहे. यानंतर अदानी एंटरप्रायझेसमध्ये 3,279 कोटी रुपये, अदानी पोर्ट्समध्ये 3,205 कोटी रुपये, अदानी ट्रान्समिशनमध्ये 3,036 कोटी रुपये, अंबुजा सिमेंट्समध्ये 1,474 कोटी रुपये, अदानी ग्रीन एनर्जीमध्ये 871 कोटी रुपये आणि ACC मध्ये एलआयसीच्या गुंतवणुकीत एकूण 544 कोटी रुपयांची घसरण झाली आहे.