मुंबई : भारतीय राष्ट्रीय महामार्ग प्राधिकरणाने अर्थात NHAI ने १०,५६० कोटी रुपये माथेरान ट्विन ट्यूब बोगद्यासह ८ लेनच्या मुंबई – वडोदरा एक्सप्रेसवेची कामं प्रस्तावित केली आहेत. पुढील आठवड्यापासून या मार्गाचं काम सुरू होणार आहे. या एक्सप्रेसवेमुळे जवाहरलाल नेहरु पोर्ट अथॉरिटी आणि वडोदरा विरार मार्गे प्रवासाचा वेळ ३ तासांनी कमी होण्यास मदत होईल.
या एक्सप्रेसवेचे फायदे
जेएनपीए आणि वडोदरा या ४४० किलोमीटर मार्गावरील प्रवासाचा वेळ ७.३० तासांवरुन ४.३० तासांवर येईल.
जेएनपीए आणि विरार यांच्यातील १०० किलोमीटरचं लांबचं अंतर सध्याच्या ३ तासावरुन एका तासावर येईल.
अंबरनाथ, बदलापूरच्या रहिवाशांसाठीही हा मार्ग फायद्याचा ठरणार आहे. येथील प्रवासी नवी मुंबई विमानतळ आणि जेएनपीए येथून पुढे मुंबई व्हाया ट्रान्स हार्बर लिंक असा जलद प्रवास करू शकतील.
हा मार्ग जून २०२५ पर्यंत पूर्ण होईल अशी माहिती आहे. हा मार्ग विरार अलिबाग कॉरिडॉरचा भाग म्हणून रायगडमधील मुंबई पुणे ई-वे आणि पनवेल तालुक्यातील अलिबागशी जोडला जाईल.
माथेरान ट्विन ट्यूब टनलची वैशिष्ट्यं
ठाणे जिल्ह्यातील अंबरनाथमधील भोज गाव आणि रायगड पनवेलमधील मोरबे गावादरम्यान ४ किलोमीटर लांबीचा हा बोगदा असेल. या बोगद्याची उंची ५.५ मीटर आणि रुंदी २१.४५ मीटर इतकी आहे. प्रत्येक बोगद्याला ४ लेन असतील. ट्विन ट्यूब त्यांच्या प्रत्येक सेंटर लाइनपासून ६४ मीटर अंतरावर ठेवल्या जातील. टनलला अंतर्गत ड्रेनेज, व्हेंटिलेशन आणि लाईट्स असतील.
या मार्गामुळे वसई, ठाणे, कल्याण-शिळफाटा आणि नवी मुंबईतील ट्रॅफिकची समस्या कमी होण्यास मदत होईल.